descanso

1. s m

   Acción de descansar.

2. s m

   Aquilo que alivia a fatiga nas dificultades físicas ou morais. Na tradición oral recóllense ditos como: “Tras do traballo vén o descanso, mais tamén vén o cansazo”.

   Ex: Que o fillo se quitara das drogas foi para el un descanso.

   Sinónimos: acougo, repouso.
3. s m

   Plano horizontal entre os tramos das escaleiras.

   Sinónimos: relanzo.
4. s m

   Tempo en que se interrompe un acto ou un espectáculo.

   Ex: No concerto houbo tres descansos.

5. s m

   Obxecto sobre o que descansa unha cousa.

   Sinónimos: apoio, soporte.
6. s m
   1. [DEP]

      Posición ximnástica que se adopta ao finalizar un exercicio, consistente en colocar o pé esquerdo lixeiramente máis adiantado que o dereito, mentres por detrás a man dereita suxeita o puño esquerdo, cos cóbados cara a fóra e o corpo recto.

   2. [BÉL]

      Posición que adopta a tropa despois de recibir a orde correspondente, que consiste en colocar o pé esquerdo lixeiramente máis adiantado que o dereito; cando se portan armas longas pousase a culata no chan mentres se sostén o canón coa mán dereita; se non se levan, a man dereita suxeita o puño esquerdo.

7. descanso semanal [DER]

   Dereito do traballador a interromper a súa prestación de servicios un día e medio ininterrompido á semana, pero sen deixar de percibir a remuneración correspondente. Malia esa disposición xeral, o goberno pode ampliar ou limitar a duración do descanso naqueles sectores que así o requiran. O tempo de descanso semanal pódese acumular na proporción equivalente, por períodos de catorce días como máximo. Como norma xeral, o período de descanso semanal comprende a tarde do sábado, ou a mañá do luns e o día completo do domingo. Para os menores de idade, o descanso semanal alcanza dous días ininterrompidos.

Refráns

• As veces descansar non é o mesmo que folgar.
• bis O que quere descansar ten que saber o que é trabalIar.
• Bótate na túa cama e pensa ben na túa casa.
• Descansar, para non traballar.
• Folgade, galiñas, que vos morreu o galo.
• Moitas paradas fan os días pequenos.
• O corpo na cama, se non dorme, descansa.
• O moito folgar tamén chega a cansar.
• O que non se cansa non sabe o que é descansar.
• Ou na corte ou no cortelIo o gando quere o seu descanso e sosego.
• Para o carro e mexaranche os bois.
• Sempre andar e andar sen descansar, non hai corpo que o poida aturar.
• ¡Alégrate, albardeiro, que se queima a palla!
• ¡Folgade, galiñas, que o galo está nas vendimas!
• ¡Folgade, galiñas, que o galo morreu!