"Santa María" (Contén)

PERSOEIRO

Templo románico construído nos anos finais do século XII. Está formado por unha ábsida rectangular á que se accede por un arco de medio punto con capiteis cubertos con follas rematadas en volutas e esférulas. A portada occidental ten dúas arquivoltas, a maior sostida por columnas, e un tímpano que prolonga o lintel para formar a primeira doela do arco de descarga que o rodea, característica dalgunhas igrexas da zona de Chantada.

IGREXAS

Igrexa de orixe románica do s XII situada en Arabexo (Val do Dubra). Conserva no interior un arco triunfal que descansa sobre columnas de capiteis con decoración vexetal. No fondo da ábsida atópase un pequeno retablo barroco pertencente á escola compostelá.

IGREXAS

Igrexa románica construída arredor do 1180 en Antas de Ulla. Nela destaca a decoración da portada principal, do arco triunfal e do exterior da ventá da ábsida: a rosca cúbrese con casetóns ou rectángulos tallados na pedra e con motivos ornamentais labrados en baixorrelevo no medio da composición, ornamentación típica nalgunhas portadas de templos da Galicia central. Cómpre tamén citar os tímpanos que exhiben cruces nas portadas occidental e meridional, o da primeira de lintel bilobulado.

IGREXAS

Igrexa parroquial de tipo mariñeiro construída a finais do s XV en Laxe; sitúase dentro do grupo máis arcaico de estilo tardogótico. A súa planta é rectangular e está cuberta a dúas augas con artesoado de madeira. O presbiterio está cuberto cunha bóveda de crucería. Aínda que resolta cunha grande austeridade decorativa, conserva un retablo gótico de granito formado por cinco taboleiros nos que se representan escenas da Paixón de Cristo.

IGREXAS

Igrexa románica de transición ao Gótico do último terzo do s XIII. Existiu un templo no s XII que dependía do mosteiro de Santa María de Oia. Diego de Muros concedeulle o rango de Colexiata en 1482, na actualidade é igrexa parroquial. O edificio reflicte a infuencia das propostas arquitectónicas cistercienses cunha planta basilical de tres naves, con cuberta de madeira, que se corresponden con tres ábsidas abovedadas con canón apuntado. Destaca a súa austeridade, manifestada tanto no interior como nos muros do exterior. A portada principal resólvese con arquivoltas lixeiramente apuntadas sobre columnas acobadadas e cun rosetón. Aparece flanqueada por dúas torres inconclusas. No muro S atópase unha capela cuberta con bóveda estrelada (s XVI?). No interior destaca a presenza do retablo maior barroco, obra de Antonio del Villar (1726). Posúe un certo estilo de igrexa-fortaleza.

IGREXAS

Igrexa parroquial situada no concello de Beade. A fábrica actual é do s XVI, aínda que se conservan restos dun edificio románico anterior: no muro S atópase un aleiro con arquiños sobre ménsulas e no muro N, no interior da nave, un friso que anuncia o gótico. Consta dunha nave, con capelas acaroadas a ambos os lados, cuberta cunha bóveda de medio canón. Accédese ao presbiterio por medio dun arco apuntado cuberto por unha bóveda nervada. A fachada principal é barroca do s XVIII, cunha torre-campanario obra do mestre canteiro local Dionisio Vidal (1757). No interior consérvanse diversos sepulcros, entre eles o do comendador de Beade e Ribadavia, frei Arias López Fandiño de Goyáns (1534). Conserva esculturas, de 1608, de Francisco de Moure: santa Ana, santa Isabel, santa Lucía, a Virxe e san Ildefonso.

IGREXAS

Igrexa parroquial situada en Caldas de Reis. De estilo románico, está datada a finais do s XII. Só conserva da antiga fábrica medieval a ábsida, o rosetón da fachada occidental e un treito do muro sur. Consta dunha nave, reconstruída en gran parte, e ábsida semicircular precedida dun tramo recto, do que a separa un arco faixón, e cuberta por unha bóveda de canón que remata en cuarto de esfera. O hemiciclo está dividido por medio de dúas columnas entregas de basas áticas e capiteis de decoración vexetal. O arco triunfal presenta un aspecto case de ferradura. Polo exterior da ábsida destaca unha fiestra con arco de medio punto sostido por columnas. Na fachada principal hai un rosetón posterior e no muro meridional ábrese unha porta rematada en arco semicircular sostido por dúas columnas, unha delas recuberta e con puntas de diamante nas acanaladuras.

IGREXAS

Igrexa parroquial situada no concello de Lalín. De estilo románico, está datada arredor do 1170. Da primitiva fábrica conserva a nave, co exterior encalado agás o beiril e os canzorros, que representan bóvidos, aves, figuras humanas e grandes follas. No Museo de Pontevedra consérvanse catro capiteis: o primeiro representa a Daniel entre os leóns; o segundo a tres leóns coas patas enlazadas por un talo; o terceiro a outros tres leóns, un deles devorando a un home, e o derradeiro ten decoración vexetal.

IGREXAS

Igrexa parroquial situada en Agolada. Datada a finais do s XII ou principios do s XIII, conserva unha capela románica de planta semicircular, cun breve tramo recto. O arco triunfal é apuntado e dobrado, apoiado en dúas columnas rematadas en cadanseu capitel decorados con grandes follas lisas e bólas. Algúns canzorros do beiril presentan figuras de animais.

IGREXAS

Igrexa situada en Monterroso. Datada no primeiro cuarto do s XIII, o primitivo románico sufriu certas modificacións que afectaron especialmente á cabeceira. A nave recibe luz por medio de ventás de medio punto e derramamento interior. Polo exterior, os canzorros son froito das reformas. Destaca a portada occidental, que remata cun lintel de extremos graduais, sostido por sinxelos ángulos entrantes.