Temas
Cantón de Suíza que comprende os extremos nororientais do Jura e do Mittelland, drenado polo Rin, o Aare e o Reus (1.405 km2 ; 503.900 h [1991]). Pola proximidade de Zúric é predominantemente industrial. A poboación é de fala alemana. Foi incorporado á Confederación Helvética no ano 1803, trala unión de territorios de Austria e dos cantóns de Zúric e de Berna. A capital é Aarau.
Cantón de Suíza (37 km2; 193.053 h [1998]). A capital é Basilea.
Cantón de Suíza (282 km2; 406.700 h [2000]). A súa capital é Xenebra. Incluído no extremo occidental do lago Léman, forma como un estreitamento que se estende ata Francia. É un cantón moi poboado cunha maioría de poboación urbana de lingua francesa. Ten cultivos de cereais e viñas e críase gando bovino. A actividade industrial concéntrase na capital.
Cantón de Suíza (5.959 km2; 938.647 h [estim 1998]). A capital é Berna. Comprende o Oberland, área alpina de economía gandeira e forestal, e o Mittelland, que envolve a cidade de Berna, cun relevo de outeiros e de economía agrícola e industrial. Ata 1977 comprendía tamén o Jura bernés, que ese ano se converteu nun novo cantón suízo (Jura). A historia política do cantón confúndese, ata o triunfo do movemento liberal (1831), coa historia política da cidade de Berna, a súa capital.
Cantón de Luxemburgo, ao SL do país, no Gutland (211 km2; 51.960 h [2001]). A capital é Grevenmacher (21.664 h [2001]). Atravesado na parte oriental polo Mosela, que fai de límite con Alemaña, no seu val cultívase a viña.
Cantón de Suíza (518 km2; 255.305 h [1998]). A capital é Liestal (12.300 h [1994]).
Cantón do S de Suíza, situado no límite con Francia e Italia (5.224 km2; 270.800 h [2000]). A súa capital é Sion. Corresponde aproximadamente coa conca alta do Rhône. Esténdese desde Sant Gottard, ao L, ata o lago Xenebra, ao O. O límite N está formado pola liña de cumios do Oberland de Berna e os Alpes de Friburgo, mentres que o límite S pasa pola liña de picos dos Alpes Peninos. Hai un sector montañoso, con cumios de máis de 4.000 m, formado polos Alpes Berneses ao N e polos Peninos ao S, coas máximas altitudes do país. Dous terzos da poboación son de fala francesa, e un terzo alemá. Destaca a gandaría. A abundancia de enerxía hidroeléctrica orixinou unha forte industrialización, que, xunto co turismo, son os dous sectores máis importantes da economía. Ocupado polas tropas da Revolución (1798), en 1802 converteuse en república libre e independente. Anexado a Francia en 1810, integrouse na Confederación Helvética en 1814. En 1847 formou parte do Sonderbund.
Cantón situado ao O de Suíza (803 km2; 168.000 h [2000]). A súa capital é Neuchâtel (31.600 h [2001]). Esténdese sobre a vertente oriental do Jura ata o lago homónimo. A estreita franxa que bordea o lago é o sector máis poboado e máis próspero, ao tempo que o clima, máis moderado, permite o cultivo de vide e árbores froiteiras. Desde o s XVIII desenvolveuse unha industria especializada no estampado de teas e reloxaría. Tamén destacan a de maquinaria de precisión, a papeleira e a de madeira.
