Temas

Encoro no curso alto do río Avia; recolle, principalmente, a auga do río Cardelle, aínda que tamén conflúen nel outros ríos (Couso e Valdeiras) e regueiros (Val de Cerdeiras, Cabaleiros, da Serra, Pallares, etc). Está situado no territorio dos concellos do Covelo, Avión e Leiro.

Encoro construído en 1966 no curso baixo do río Volta, Gana, cun dique de 130 m de altura e 650 m de longo.

Encoro sobre a cabeceira do río Navea, afluente do Bibei, provocado pola presa situada no límite entre as parroquias de Casteloais e Celeiros. Formado na confluencia dos regos de San Fiz e de Queixa co río Grande, baña ademais das parroquias xa citadas, as de Chandrexa, Vilar e O Candedo. A presa construíuse en 1953 e a súa finalidade é fundamentalmente o aproveitamento hidroeléctrico.

Encoro sobre o río Limia provocado pola presa construída en Lindoso, freguesía do municipio portugués de Ponte da Barca, e que asolaga terras das parroquias da Illa (concellos de Entrimo e Lobios), Galez (Entrimo), Manín, Lobios, Araúxo, Torno e Grou (Lobios). As augas, que ocupan 1.072 ha, asolagaron as aldeas de Aceredo, Buscalque, O Vao e Quintela (Lobios) e A Reboleira (Entrimo), polo que os veciños afectados se mobilizaron en 1991, cando o goberno español deu pulo ás obras.

Encoro sobre o río Xallas provocado pola presa do lugar da Fervenza, no límite entre as parroquias (e concellos) de Olveira (Dumbría) e Boas (Mazaricos). O encoro asulagou terras das parroquias de Olveira (Dumbría), Baos, Alborés e Antes (Mazaricos), Brandomil e Brandoñas (Zas) e Serramo (Vimianzo).

Encoro no río Columbia, no estado de Washington, EE UU. Rematouse de construír en 1942, e é un dos máis importantes do país en produción de enerxía eléctrica.

Pantano creado coa construción dunha presa sobre o leito do río Bibei, situado entre os concellos de Ribas de Sil e Quiroga. O encoro abrangue unha superficie de 71,72 ha e está situado antes da confluencia do Bibei co Sil. A presa, construída por Iberdrola entre as parroquias de Peites (Ribas de Sil) e Montefurado (Quiroga), emprégase para a explotación dunha central hidroeléctrica cunha potencia superior aos 10 MW.

Pantano creado coa construción dunha presa sobre o leito do río Salas. Encoro compartido con Portugal, está situado entre os concellos de Muíños e Calvos de Randín (Ourense) e Tourem (Portugal). A presa foi construída por ENDESA para a explotación dunha minicentral hidroeléctrica, polo que é utilizado para o abastecemento. Ten unha superficie de 734,37 ha.

Encoro sobre o río Mao, tributario do Cabe, da conca do Miño, provocado pola presa construída no límite das parroquias de Vilasouto e Eirexalba (O Incio). Cunha capacidade de 20,45 hm³, abastece a Terra de Lemos.