Temas

Pantano creado coa construción dunha presa sobre o leito do río Miño, entre as parroquias de Cudeiro e Velle, no concello de Ourense. Inaugurado en 1966, ten unha capacidade de 17 hm³, cos que alimenta unha central de produción de enerxía hidroeléctrica e ademais, xunto co encoro de Cachamuíña, abastece de auga á cidade de Ourense.

Pantano creado coa construción dunha presa sobre o leito do río Sil, no concello de Carballeda de Valdeorras, no límite co concello de Rubiá. Ten unha superficie de 60,84 ha.

Encoro no río Columbia, no estado de Washington, EE UU. Rematouse de construír en 1942, e é un dos máis importantes do país en produción de enerxía eléctrica.

Pantano creado coa construción dunha presa sobre o leito do río Miño, situado preto da confluencia dos ríos Bubal e Sil, na parroquia dos Peares (A Peroxa). Abrangue unha superficie de 495,50 ha e foi construído por FENOSA para a explotación dunha central hidroeléctrica cunha potencia superior aos 10 MW. Acolle un volume de 182 Hm³ de auga. Inaugurouse en 1955.

Pantano creado pola construción dunha presa sobre o leito do río Xares, situado na parroquia de Prada, no concello da Veiga. Construíuse en 1958 facendo que a aldea de Alberguería quedase asolagada. O encoro ten unha capacidade de 122 hm³ aproveitando un total de 10 km onde o río estaba fortemente encaixado. O encoro pertence á empresa FENOSA.

Encoro provocado pola presa de Vilagudín na confluencia dos ríos Maxarín e das Cerdeiras, afluentes do Lengüelle, da conca do Tambre, no límite entre as parroquias (e concellos) de Gorgullos (Tordoia), Lesta (Ordes) e Xesteda (Cerceda). Ten un aproveitamento piscícola.

Encoro sobre a cabeceira do río Navea, afluente do Bibei, provocado pola presa situada no límite entre as parroquias de Casteloais e Celeiros. Formado na confluencia dos regos de San Fiz e de Queixa co río Grande, baña ademais das parroquias xa citadas, as de Chandrexa, Vilar e O Candedo. A presa construíuse en 1953 e a súa finalidade é fundamentalmente o aproveitamento hidroeléctrico.

Encoro sobre o río Limia provocado pola presa construída en Lindoso, freguesía do municipio portugués de Ponte da Barca, e que asolaga terras das parroquias da Illa (concellos de Entrimo e Lobios), Galez (Entrimo), Manín, Lobios, Araúxo, Torno e Grou (Lobios). As augas, que ocupan 1.072 ha, asolagaron as aldeas de Aceredo, Buscalque, O Vao e Quintela (Lobios) e A Reboleira (Entrimo), polo que os veciños afectados se mobilizaron en 1991, cando o goberno español deu pulo ás obras.