Temas

Donón

Xacemento arqueolóxico situado na parroquia do Hío (Cangas), formado por un conxunto de gravados rupestres, construcións arquitectónicas castrexas e aras romanas. Os gravados de Mogüelos, na Bouza de Arriba, teñen representacións xeométricas de círculos e rectas; sobre unha rocha de granito hai gravadas dúas figuras triangulares e sobre outra unha folla cos lados curvos e unha posible nervadura central. No monte do Facho e noutros lugares localizáronse outros gravados. O conxunto de aras romanas, conservadas no Museo de Pontevedra e no Museo Municipal Quiñones de León de Vigo, están decoradas con diversos motivos, entre os que destacan as aspas e os arcos, e teñen caracteres epigráficos. A maioría das conservadas presentan un remate en forma de frontón apuntado e identificáronse como exvotos ofrecidos a un santuario que puido estar dedicado a Baco, ás divindades indíxenas, entre as que destaca Biberabreo, ou aos Lari Deo. No monte do Facho consérvanse dous conxuntos arquitectónicos: un...

Máis >
Barranco León

Xacemento arqueolóxico do Plio-plistoceno (1,8 M a) sobre un nivel lacustre situado no concello de Orce (Andalucía). Nesta localidade atopáronse numerosos restos de animais parcialmente removidos, asociados a un conxunto de sílex no que predominaban as pequenas lascas, aínda que tamén se detectou a presenza de núcleos e manuportes. A análise espacial do xacemento demostra a existencia de dous solos diferentes, no primeiro deles establécese unha clara relación entre as industrias líticas e os restos dun hipopótamo. Así mesmo, nesta localidade arqueolóxica detectouse un molar humano.

Máis >
Ain Ghazal

Xacemento neolítico da Cisxordania de grande extensión que rexistra unha fase final do Neolítico precerámico do Próximo Oriente (6200/5500 a C), na época en que nesta rexión remata o proceso de domesticación animal (bóvidos, cápridos e porcino). Cómpre salientar a presenza neste xacemento de estatuaria de arxila representando humanos a tamaño natural.

Máis >
Cigarralejo, El

Xacemento arqueolóxico ibérico localizado preto de Mula (Murcia). Está constituído por un santuario, do que proceden numerosas esculturas de pedra que representan principalmente cabalos, unha necrópole dos ss IV-III a C e un poboado.

Máis >
Parpalló, cova de El

Xacemento arqueolóxico situado en Gandía (València). A escavación demostra a presenza das industrias normais en Europa Occidental, do Paleolítico Superior, época en que foi intensamente habitada; cunha cronoloxía que abrangue desde o Gravetense ao Madalense.

Máis >
Çatal Hüyük

Xacemento neolítico da chaira de Konya, en Turquía. Foi escavado por J. Mellaart, investigador da escola inglesa de Ancara. Os seus doce niveis están datados entre o 6500 e o 5650 a C. Trátase dunha aglomeración de casas rectangulares, con almacéns e lugares adxacentes; as casas teñen a entrada no tellado, con escaleiras de madeira, e as ventás están situadas na parte superior dos muros. Apareceron nos seus restos vasos de madeira e de vimbio, e recipientes de coiro de etapas precerámicas. Os mortos soterrábanse dentro das casas despois de descarnarse ao aire libre. Hai tamén unha gran cantidade de capelas da deusa Nai con interesantes pinturas murais.

Máis >
Val dos Reis

Xacemento arqueolóxico exipcio situado á beira occidental do Nilo, á altura de Luxor. Consta de dous vales, o do O ou dos Monos, onde se atoparon catro tumbas, e o do L ou Val dos Reis, onde se atoparon 58 tumbas que van do reinado de Tuthmosis I ao de Ramsés IX (dinastías XVIII-XX), e na súa maioría son reais. As tumbas máis importantes son as de Tuthmosis III, Amenofis II, Tuthmosis IV, Merenptah, Ramsés III, Ramsés IV e Ramsés VI. A de Tutankamon atopouse intacta.

Máis >
Piedras Negras

Xacemento arqueolóxico maia situado no val do río Usumacinta, en Guatemala. A cidade floreceu nos ss VII e VIII, durante a época clásica. As esculturas, estelas e placas con relevos, feitas en pedra calcaria, considéranse das mellores e máis perfectas da arte maia.

Máis >
Cunchosa, A

Xacemento arqueolóxico situado na ría de Aldán, na península do Morrazo. O núcleo principal sitúase sobre a praia da Cunchosa. Atopáronse restos de industria lítica e, sobre todo, cerámicos. A cerámica, cocida ao aire libre e feita a man pola técnica dos cordóns, é semellante á doutros xacementos do Neolítico anterior ao Megalitismo do IV milenio a C.

Máis >
Loading