Temas

Localidade do Lacio, Italia (32.101 h [1991]). É un porto pesqueiro do mar Tirreno e centro de veraneo. Corresponde á antiga Antium, que foi conquistada por Roma, chegando durante a Época Imperial a ser unha famosa estación de ocio. Nas escavacións realizadas atopáronse numerosas obras de arte, entre elas a Moza de Anzio, estatua probablemente grega do s III a C, o Apolo do Belvedere e o Gladiador Borghese.

Localidade do municipio de Santa Colomba, na comarca de La Maragatería, que está integrada na provincia de León, Castela e León, e situada á beira do Camiño Francés de peregrinación a Santiago. Está localizada no monte Irago, nos límites coa comarca do Bierzo, e foi o primeiro lugar da comarca que contou con hospital de peregrinos no s XVI.

Localidade do estado de Colorado, EE UU, nas Montañas Rochosas (853 h [1970]). A febre do ouro desatada a comezos do s XX provocou a chegada dun aluvión demográfico que superou os 50.000 h neses anos, feito que a converteu nun dos centros máis prósperos do país.

Localidade de Nafarroa, situada nos Pireneos Orientais, no val de Esteribar, á beira do Camiño Francés de peregrinación a Santiago. O enclave formouse ao redor de dous mosteiros consagrados a Santa María e San Agustín que despois pasaron a depender de Leyre. Foi cabeza do val de Estereibar. No s XI contaba cun hospital de peregrinos e chegou a ter dous atendidos polas confrarías de Santiago e San Blas. No s XII recibiu o foro dos francos, artesáns estranxeiros xeralmente franceses que realizaron a actual configuración urbana con casas aos dous lados do Camiño. En 1329 celebráronse as Cortes para recibir o xuramento de Filipe II de Évreux e Xoana II de Navarra. Destacan a igrexa de San Nicolás de Bari (s XIII), as ermidas de San Blas e de Santiago, e a ponte gótica.

Localidade do concello de Santa Colomba de Somoza, na comarca de La Maragatería, integrada na provincia de León e na Comunidade Autónoma de Castela e León, situada á beira do Camiño Francés de peregrinación a Santiago de Compostela. Aínda que a primeira referencia histórica data do 946 no reinado de Ramiro II nunha doazón ao mosteiro de Santa María de Tabladillo, a orixe da vila está na fundación por parte do ermitán Gaucelmo, co beneplácito de Afonso VI, dunha hospedería, unha igrexa e un hospital de peregrinos. En 1103 constátase a consolidación dunha pequena vila ao redor da igrexa de San Salvador, das hospederías de Fonsabatón e Irago e os hospitais de Santa María e San Xoán. Á saída do pobo atópase o milladoiro da Cruz de Ferro, que sinalaba a entrada da ruta framcíxena no Reino de Galicia, na comarca do Bierzo.

Localidade de Hungría, situada ao O de Budapest, onde en 1963 foi descuberto un xacemento arqueolóxico correspondente á glaciación Mindel.

Localidade arqueolóxica do estado de Andra Pradesh, India, nas marxes do río Krishna. Foi o centro da civilización budista dos āndhra (dende o s II a C ata o fin da dinastía gupta, no 320 d C). As ruínas do santuario foron descubertas por arqueólogos ingleses a mediados do s XIX. O monumento máis importante é a gran stūpa, que segue o modelo dos sānchi, e está recuberta de ricos revestimentos esculpidos. As esculturas, dun naturalismo profundo e luxuriante (Triunfo de Buda sobre o elefante Nālagiri), son da época do seu apoxeo (150-320 d C).

Localidade da provincia de Tigre, Etiopia (17.753 h [1984]). Principal centro relixioso do país, especialmente da Igrexa Unida Ortodoxa Etíope (igrexa de Hedar Sion). A mediados do s IV, o territorio de Axum converteuse en reino cristián e ligouse política e relixiosamente ao Exipto bizantino. Da época de esplendor -que coincidiu coa dinastía salomónida, no s VII-, queda un conxunto de estelas colosais de pedra preto da cidade actual, que fan dela un senlleiro centro turístico.

Localidade do departamento de Saône-et-Loire, na Borgoña, Francia (4.430 h [1990]). As principais actividades económicas son a gandería e a agricultura. Carlomagno dooulle a vila á igrexa de Mâcon e no 893 pertenceu ao duque Guillerme de Aquitania, fundador da abadía de Cluny que lle deu o nome á cidade. Do seu patrimonio cómpre salientar tamén a igrexa románica de Saint-Marcel e a igrexa gótica de Notre-Dame.

Localidade da parroquia de Adina, situada no concello de Sanxenxo. Tradicionalmente foi un pequeno núcleo pesqueiro que se converteu nun importante centro turístico das Rías Baixas. No seu porto, composto por dous diques que parten da costa, dominan as embarcacións pesqueiras, aínda que tamén posúe porto deportivo. Destacan as praias de Baltar e Caneliñas, situadas no centro do termo.